[sen-fin]
compostela (galiza), edicións positivas, 2019
depósito legal: C 8-2019
isbn: 978-84-949336-6-0

(selección de textos)

 

no visor da cámara
de alguén sentado
na fila de diante
a silueta da pianista
sobre fondo ocre
 
 
a beleza nace
ao intuír o encadre
 
o resto é técnica
ou mecánica
 
 
reproduzo o xesto
a intención
 
pero o impulso é van
 
non vou conseguir
a fotografía

cuarto de hotel
 
o movemento das pólas
detrás das cortinas
translúcidas
fai xogos de luz
no papel da parede
 
comezan a oírse voces
nun cuarto contiguo
 
discuten
 
 
a cámara permanece fixa
 
 
a medida que pasa o tempo
o intercambio sobe de ton
 
berran e
de súpeto
escóitase un golpe algo que
cae bate rompe
 
 
logo
sen que os ollos advirtan
ningunha alteración
recupérase o silencio inicial

deteste diante
dun pequeno bosque
e concéntraste no brión
que medra nas cortizas
 
 
observas pola fiestra
dúas violetas
ao pé dun castiñeiro
 
e aínda que non teñen flores
recoñeces
as pólas novas
que naceron este ano
 
 
sorpréndeste cun matiz
da luz do sol que penetra entre as follas
 
 
nesa forma oriental
de ollar arredor
de centrarse nos detalles
está a lírica
 
na conciencia do ineludíbel das mudanzas
a dor

miro na pantalla
unha fotografía
 
 
 
os recordos son
como as bólas
na árbore de nadal
 
dan brillo á follaxe escura
do esquecemento
pero rompen se caen
na baldosa fría
 
 
a lembranza non está no pasado
 
é un verso
na paisaxe do cotián