nós-dentro
vigo (galiza), editorial galaxia, 2018
isbn: 978-84-9151-158-8

 

(tres poemas)

 

se a terra vira
todos os días
na dirección dun abismo diferente

cal o significado
dunhas poucas existencias fugaces?

cal a consecuencia dunha felicidade
efémera
dunha flor que rompe
a capa fina da primeira neve
e desprega os seus pétalos

por unhas horas

até a seguinte nevarada?

 

a cor quedará conxelada
no agardar da primavera

e cando a neve vire auga
barro
da flor non quedará nin sequera
a sensación dunha falta

linlle a celso uns versos

 

é fermoso
porque é triste

 

era unha cita de rayuela
pero a celso recordoulle
unha vez no coche con estevo
e chovía

 

 

faleille despois a estevo
da lembranza de celso

non era só a choiva
dixo estevo
soaba tamén
unha canción de meredith monk
dunha tristeza preciosísima

os fentos demandan auga
case a diario

e lembran os recantos escuros
no xardín de daniel

 

 

é un sentimento confuso
entre compaixón e fastío

pero collo a xerra
régoos outra vez
e sento a ver as pólas febles
como recuperan logo a forza

 

 

o abismo de saber
que algo pende dos meus xestos

como contigo