entrar na casa
(en colaboración con ignacion castro “nachok”)
compostela (galiza), estaleiro edicións, 2015
isbn: 978-84-606-7517-4

 

(dous poemas)

 

os marcos están situados

pero a cartografía non procura ordenar

só
describir

a historia foise facendo
cos outros e a súa
mudez

cos que marchan
ou son expulsados
e teiman na memoria dos muros

no mapa aparece un apeadoiro
unha bifurcación
unha senda que se esfiaña

desde quen fala hai un argumento principal

ou acaso
até quen fala hai
etcétera

até aquí
a declaración de intencións

a beleza está
no detalle

as maceiras
deseñan fíos nidios entre as nubes

igual que a claudia dun poema
inconcluso
unha mazá permaneceu solitaria na póla máis alta
sen caer sen que a picasen os paxaros

enganchada á orixe
consumírase en si mesma coa chegada do frío

volvín coas mans
vermellas azuis duras
de turrar da vida

as chaves están postas

cando alguén decida facelas xirar
é posíbel que xa non se movan