n falaba
do clavel del aire

unha flor
que facía parte
da memoria de m

pero no relato
deviña invasora
ocupábao todo
abafaba as árbores
até o exterminio

a paisaxe da conversa
e a da memoria de m
eran diferentes

ou ben

o relato causaba
nas postais da infancia de m
un defecto de forma

m escoitaba
e debatíase entre o esforzo
de intercalar a novidade
nas súas propias fotografías
ou facer
resistir
a paisaxe

é máis cálida a memoria dun tempo
e un lugar inexistentes?

ou a certeza de sabermos deseñar
territorios novos
aínda que doian?

o poema é
o negativo dunha foto
neboenta

e se procuras entender
o presente
cuestionando a paisaxe
o mundo vólvese inestábel

son iguais as singraduras da balea

conservan memoria na pel
pero eses mapas son
invisíbeis aos seus ollos