ir ao contido →

os veos da paisaxe (ed. bourel)

os veos da paisaxe
ribeira (galiza), edicións bourel, 2009
depósito legal: C 162-2009
edición sen isbn

[selección de imaxes]

 

son tempos
de pensar a ausencia
de gardarmos
nun caixón as bágoas

son tempos de ollar a chuvia
a través dos cristais

embazada a memoria

null

botar as redes
cubrirnos de vento

hai un país de catedrais
homes en silencio
longos camiños cara ao mar

null

a paisaxe ocúltase
detrás da vaga néboa

a paisaxe ten sete veos
e no fondo
núa
aniña a memoria

null

mira os barcos no peirao
como se xuntan
e se afastan coas ondas

mira as gaivotas
a se acochar unhas
contra as outras

os pescadores
co ollar detido
no horizonte

null

ondea a roupa no tendal
recibe outra vez o orballo

null

cos primeiros merlos
acordan os cans

os homes
pestanexan co sol
húmido do mencer

null

a auga que baixa
das montañas
corre polas rúas baleiras

nas casas só quedan
sombras
e algún ancián
que xa esqueceu o calendario

null

son tempos
de pensar a ausencia

null

o home vello á sombra
da aciñeira
conta as cabras
dálles nome

a vella muller na cociña
nomea os paxaros
os días e as dores

null

a campá non ten badalo
só o gorgolexo
das pombas toca a misa
ou a defunto

null

neste muro hai os prantos
de amor de moitas mozas
e homes vellos
e deuses

null

nos balcóns xa non quedan
xasmíns nin cravos nin rosas

morreron coa xeada
o último inverno

null

conta cada un
dos seus cabelos

coñece cada liña
cada movemento

cando ergue o sol
e orballa nas roseiras do patio
fíos de la acomoda en certos
e determinados lugares

elena
atada nos espellos
peitéase
todo o día

null

o mediodía

as cociñas
cheiran a ourego

os manteis vermellos
o vapor das cazolas

o golpe das culleres
os risos entre os muros
paxaros engaiolados

null

na mesa
unha cesta con froitas de louza
e teas de araña

null

fumegan os pratos
falan alto as mulleres na praza
por un momento
a paisaxe non ten veos

null

as follas secas baten
con dozura portas e fiestras

logo pérdense
non hai
ninguén para escoitalas

null

na cociña unha avoa
remexendo no caldeiro

no cuarto unha curmá de
quince anos
deitada co seu mozo
ás agachadas

null

a tarde

as horas son máis lentas
á sombra do limoeiro

null

e cando chove séntense
as gotas no tellado nas
pólas secas o pranto
nas paredes balorentas

null

os balcóns
énchense de flores co verán

unha moza corta o seu orballo

pono no xerro da sala
xunto á foto do pai morto

null

no patio
unha vella figueira de pólas longas
cubertas de ouricela

os soños
confúndense a esta hora
entre as follas

null

as árbores da infancia
inclínanse sobre o alxibe

buscan a súa imaxe reflectida
no espello de auga

null

esta terra perténceme
terra branca de séculos e cinza

acóugame esta terra
estas árbores de mans abertas

null

hai unha carballeira gris
un río nalgures que murmura
paxaros
néboa

recantos desta terra prometida

null

chega do río
o canto das lavandeiras

null

o vento procura
a idade nas follas
o silencio nas cortizas

null

detrás dos muros
unha moza esperou

todo o día
os días seguintes
o home que a levase lonxe
a algunha nova terra
e máxica
vestida de branco e
cun ramo de lirios nas mans

null

atoparasme no camiño
preto da última árbore

a derradeira

null

pérdense
as follas secas
vanse espallando
cara ao horizonte

que é como dicir
cara a ningures

null

na fiestra os últimos
efémeros fíos do sol
nas pólas máis altas

null

cando é tarde só quedan
pedras e poeira no camiño

null

a noite

unha bandada emigra da paisaxe

null

en leitos de ferro
detrás das cortinas
as rapazas agachan
os seus soños prohibidos

presos entre as sabas

null

os farois
arrandean co vento e no campanario
o moucho vixía
as casas silenciosas

espantallo
mantén afastadas as lembranzas

null

polas casas
a silueta dunha muller

sobre a paisaxe feminina
debrúzase a noite

null

a terra ten cansazo de auga
nas fendeduras

nos ritos do verán
o plenilunio

null

silencio
esta noite está pechada para os grilos

null

a paisaxe prega en silencio
pide perdón
antes de quitar o último veo

 

 

para ver algunhas das imaxes que ilustraron esta edición, fai clic aquí